Հարցազրույցներ և մամուլի ասուլիսներ

img

Գրիգորյանը մտադիր է ռուս գործընկերներին փոխանցել Հայաստանի մտահոգությունը Ադրբեջանին զենքի մատակարարման շուրջ

28 / 05 / 2018

Շուրջ տասն օր առաջ Անվտանգության խորհրդի քարտուղար նշանակված Արմեն Գրիգորյանն այսօր Սարդարապատի հուշահամալիրում «Ազատությանն» ասաց, որ պատրաստվում է ռուսաստանյան կողմի առաջ բարձրացնել Ադրբեջանին զենք վաճառելու վերաբերյալ հայկական կողմի մտահոգությունները:
Իր առաջին արտերկրյա այցով չորս օր առաջ Աստանայում Հավաքական անվտանգության պայմանագրի կազմակերպության (ՀԱՊԿ) Անվտանգության խորհուրդների քարտուղարների կոմիտեի հերթական նիստի շրջանակներում Գրիգորյանը հանդիպում է ունեցել նաև Ռուսաստանի անվտանգության խորհրդի քարտուղար Նիկոլայ Պատրուշևի հետ:
Այդուհանդերձ, այս անգամ Ադրբեջանին զենքի վաճառքի հարցը հայկական կողմից չի բարձրացվել․ - «Հիմնականում քննարկել ենք հայ-ռուսական հարաբերությունները, հայ-ռուսական հարաբերություններում գոյություն ունեցող լավ կողմերը և այդ լավ կողմերը զարգացնելու ուղիները»:
Գրիգորյանն ասաց, որ Ադրբեջանին ռուսաստանյան արտադրության զենքի մատակարարման շուրջ հարց չի բարձրացրել․ - «Պատրաստվում եմ բարձրացնել: Քանի որ առաջին առաջին այցն էր, հիմնականում խոսում էինք գոյություն ունեցող խնդիրների մասին: Ավելի շատ ճանաչողական այց էր և՛ ինձ համար, և՛ նրանց համար»:
Գրիգորյանը, ով տարիներ շարունակ, որպես քաղաքագետ ռուսական կողմի ու նրա նախաձեռնած Եվրասիական տնտեսական միության ու ՀԱՊԿ-ի սուր քննադատներից էր, այսօր «Ազատությանն» ասաց, որ Ղազախստանում իր նկատմամբ տարբերակված վերաբերմունքի չի արժանացել․ - «Անկեղծ ասած՝ գնալիս ես էլ եմ նման մտահոգություն ունեցել, բայց այցս շատ դրական եմ ընկալել, նաև ջերմություն եմ զգացել այդ քաղաքական գործիչների կողմից՝ երևի երիտասարդ լինելու կամ այլ բաներով պայմանավորված»:

Աստանայում իր ելույթով Գրիգորյանը վերահաստատել էր Հայաստանի աջակցությունը Սիրիայում Ռուսաստանի գործողություններին: Անդրադարձ էր կատարվել նաև տարածաշրջանային այլ խնդիրների ու մարտահրավերների, սակայն ոչ ղարաբաղյան հարցին ու Ադրբեջանի ագրեսիվ հայտարարություններին:
Հարցին, թե ինչու՞ է այս հարցը դուրս մնացել Հայաստանի անվտանգության խորհրդի քարտուղարի ելույթից, Գրիգորյանն արձագանքեց․ - «Պաշտպանության հարցերով ավելի շատ խոսել է պարոն [Պաշտպանության նախարար Դավիթ] Տոնոյանը»:
«Մերժիր Սերժին» նախաձեռնության համակարգողներից մեկը հանդիսացող Գրիգորյանը վարչապետ Նիկոլ Փաշինյանի կողմից Անվտանգության խորհրդի քարտուղար նշանակվեց մայիսի 17-ին:

Հղումն այստեղ